八十後的生存與生活：通識教人的事

通識教了他什麼

面對所有通識問題，對他而言，都只得一個回答方法。

今年考通識的Ｊ同學，和學民思潮得到5**的狀元張秀賢同學不同。他只考到4。現在的考試系統，由5**起，到5*、5，之後到4。因此，如果對比以前高考的分級，4，看起來好像不太差，但應只是Ｄ。以前會考放榜，我媽看著我的成績單，她會自動看不見Cred（Ｃ）以上的成績，就只問我，為什麼我ＸＸ科會有一個Ｄ。

現在我是人家的老師，面對考試這種閉門定時定點靠記憶和狀態的遊戲，大家都知道，教育所帶來的影響，當然不是學生時代很在乎的那一分半分。國民教育是不是洗腦，母語教學是不是令學生中英俱差，這都不可定論。但對Ｊ而言，他認為會考教他的事，和通識科，都令他對看世事的方法有改變。

「其實，通識要合格一Ｄ都唔難架。」Ｊ同學喝著啤酒，對我說：「拿，條問題呢，就一定係有正反兩面既。佢地而家咁既狀態，一定唔可以話答贊成就畀分，反對就唔畀。佢地一定贊成同反對既答案，都要畀分。所以呢，如果你寫果陣，就列齊返Ｄpoints，之後寫果陣，就寫First of all／Secondly／Thirdly……，之後有個總結，個conclusion你夾返自己講左幾多個贊成個point，幾多個反對既point，咁最後你就係開始同埋結尾度話你agree或者disagree in a large extent，咁咪得囉。」

通識科就真的是這樣教你答題目嗎？

「你冇計架喎。而家佢一定係將所有野都講到呢，左邊睇呢就睇到Ｄ好處，右邊睇呢就睇到Ｄ壞處喎，咁所有事情呢，都係冇對錯既。」Ｊ同學說。

這樣就叫多角度思考嗎？

「對啊，通識科就係要咁呀。數學、物理、果Ｄ，都一定有model answer，但係通識科佢話畀你聽冇，其實有同冇，我地都唔知。上次做果份卷，話冇model answer，但係最後又有marking scheme，好清楚咁寫明答咩會即刻有分，答咩就要閱卷員自行決定。咁頭果幾年，佢地一定唔敢話呢科係有model answer既，咁學生只要放膽答放膽寫，佢一定唔會唔畀分。」Ｊ同學，你只得一個Ｄ，也可以那麼有自信的說這樣的話嗎？「真係要多角度思考，其實要花好多時間。好似國民教育果Ｄ咁，我覺得好奇怪，佢地叫我地讀當代中國，就挖晒中國Ｄ衰野出黎。咁，每個國家都有衰野架啦，好似我個親戚係美國，佢話佢停低架車係條路度講電話，有兩個黑鬼（有色人士）就打爛佢個車窗，連電話都搶埋。咁你話美國又好好咩？我覺得呢Ｄ咁既現代中國既通識科，有時真係好偏頗囉。」

Ｊ同學的說法，非常有趣。也足以證實了，通識科事實上是失敗的。當這一科出現的時候，大家都說，學生可以有批判思考，也有解放思維。但當科目要考試的時候，他們就追求答案。邏輯訓練，雖然小班教學才會成事。這是我教大學的時候深知的事情。現在是一班四十多人，要他們討論，一課四十分鐘，分個組，每組十分鐘，之後報告，這樣一節課就沒有了。那麼，他們可以談到什麼？就不過是印象式的蜻蜓點水，最後就只得出簡單的概念：把對錯觀模糊化，認為誰對誰錯，誰說得清。

「但事實上，我想不是個別事件，而是事情發生的肌理很重要吧。」我對Ｊ同學說：「你試想像，同一件事，在香港、北京或洛杉磯發生，事情會有什麼不同？同一條公路上，或許在國內，發生什麼意外，民眾對受害者的反應，你看那些什麼小悅悅的新聞，你應略知一二。不可以說外國都有壞人，我們只看中國的壞事，就會覺得中國不好。這樣會令人忘掉，通識科的真義。」

我可以和Ｊ同學談天，也許可以令他思考一下，究竟通識科為他帶來什麼。因為，我很害怕，所有人都在一種「沒有對，沒有錯」的環境下，接受所有事情。因為，既沒有對錯，下一條就問：我們應如何判斷是或非。

香港的公共教育系統，毀掉了一代又一代的香港人，究竟有幾多人像我一樣，很‧在‧乎？

（原文刊於　號外月刊　2012年9月號）